בס"ד

איראן סטראשעט צו אטאקירן אמעריקאנער באזעס אין אייראפע אויב וואשינגטאן וועט דורכפירן א פרישע אטאקע


דער סעקרעטאר פון איראן'ס העכסטע נאציאנאלע זיכערהייט קאונסיל, מוחסעין רעזאי, האט ארויסגעשטעלט א שארפע ווארענונג אז טעהראן וועט פארברייטערן אירע נקמה אקציעס ווייט אינדרויסן פונעם מיטל מזרח, אויב די פאראייניגטע שטאטן וועט דורכפירן נאך אן אטאקע אויף איראנער טעריטאריע.


אין אן אינטערוויו מיט די לבנון-באזירטע 'אל מאיאדין' טעלעוויזיע סטאנציע וואס איז געווארן טראנסמיטירט דעם 11'טן נאוועמבער, האט רעזאי געזאגט אז איראן וועט נישט באגרעניצן איר רעאקציע בלויז צו אמעריקאנער מיליטערישע באזעס אין די ארומיגע לענדער. ער האט ספעציפיש געסטראשעט אמעריקאנער באזעס אין אייראפעאישע לענדער, אנגעבנדיג אז סיי וועלכע פאסיליטי וואס ווערט גענוצט צו ארויסשיקן פליגערס קעגן איראן קען ווערן א ציל.


"אויב אמעריקאנער פליגערס וועלן זיך הייבן פון אן אמעריקאנער מיליטערישע באזע, אפילו אויב עס געפינט זיך אין אן אייראפעאיש לאנד אדער אין אן אנדערע ווייטע ראיאן, צו באמבארדירן איראן, וועלן מיר אטאקירן יענע באזעס אויך," האט ער דעקלערט.


ווייטע אינזלען און מיסיל שטרעקעס

רעזאי האט אויך געווארנט אז איראן קען צילן אינזלען וואס אמעריקאנער באאמטע רעכענען אז עס איז אינדרויסן פון די שטרעקע פון אירע מיסילס, כאטש ער האט נישט אנגעגעבן קיין ספעציפישע לאקאציעס. די סטראשע קומט נאך וואס איראן האט לעצטנס געמאלדן איבערן פארברייטערן די שטרעקע פון אירע מיסיל אפעראציעס, הגם די פאקטישע קראפט פון איר ארסענאל בלייבט א גרויסע פראגע צייכן.


לויט אפשאצונגען, גייט די שטרעקע פון איראן'ס הויפט באליסטישע מיסילס ביז ארום 2,000 קילאמעטער, מיט געוויסע סארטן וואס קענען מעגליך אנקומען ווייטער. דאס מאכט עס שווער צו באשטעטיגן זייערע קלעימס איבער אטאקירן ווייטע לאקאציעס אן קיין פרישע טעכנישע באווייזן. רעזאי האט נישט עקפליציט דערמאנט 'דיעגא גארסיע', דער ווייטער אינזל אינעם אינדישן אקעאן וואס פארמאגט א געמיינזאמע אמעריקאנער-בריטישע מיליטערישע באזע, און סיי וועלכע השערה אז דאס איז געווען די ספעציפישע לאקאציע וואס ער האט געהאט אין זינען בלייבט אומבאשטעטיגט.


לייקנט פארהאנדלונגען מיט אמעריקע

די ווארענונג קומט אינמיטן אן אנגייענדע קאנפליקט צווישן וואשינגטאן און טעהראן, בשעת דיפלאמאטישע באמיאונגען גייען אן אינאיינעם מיט עקאנאמישע דרוק און די סטראשע פון פרישע מיליטערישע אקציעס.


אין די זעלבע צייט האט רעזאי אפגעווארפן באריכטן איבער יעצטיגע פארהאנדלונגען מיט די פאראייניגטע שטאטן, טענה'נדיג אז טעהראן האלט נישט אפ קיין דירעקטע געשפרעכן און אז די באריכטן איבער א מעגליכע מיטינג מיט אמעריקאנער באאמטע זענען פאלש.


זיינע ווערטער אונטערשטרייכן אבער טעהראן'ס גרייטקייט צו סטראשענען אמעריקאנער אינסטאלאציעס פיל ווייטער פונעם לאקאלן ראיאן, אויב אמעריקאנער קרעפטן וועלן דורכפירן פרישע אטאקעס קעגן איראן, וואס דאס קען לייגן א גרעסערע דרוק אויף לענדער וואס האסטירן אמעריקאנער מיליטערישע באזעס.